തിരുവനന്തപുരം: ശബരിമല സ്വർണക്കൊള്ള കേസിൽ പ്രതിയായ മുൻ ദേവസ്വം ബോർഡ് പ്രസിഡന്റും സി.പി.എം നേതാവുമായ എ. പത്മകുമാറിനെതിരായ തുടർനടപടിയിൽ അന്തിമ തീരുമാനം കുറ്റപത്രം വന്ന ശേഷമെന്ന നിലപാടിലാണ് പാർട്ടി. കേസിന്റെ ഗൗരവം കണക്കിലെടുത്ത് ആവശ്യമായ നടപടി സ്വീകരിക്കുമെന്നാണ് സി.പി.എം വൃത്തങ്ങൾ നൽകുന്ന വിശദീകരണം.
പത്മകുമാറിനെ സസ്പെൻഡ് ചെയ്ത തീരുമാനത്തെ അദ്ദേഹത്തിന്റെ ആത്മകഥാ വെളിപ്പെടുത്തലുകളുമായി ബന്ധിപ്പിക്കാനാകില്ലെന്നും പാർട്ടി വ്യക്തമാക്കുന്നു. ആത്മകഥ പ്രസിദ്ധീകരിക്കുമെന്നോ അതിൽ പാർട്ടിയിലെ പ്രമുഖരെ കുറിച്ചുള്ള വിവരങ്ങൾ ഉൾപ്പെടുത്തുമെന്നോ ഉള്ള വാർത്തകൾ നടപടിയെ സ്വാധീനിച്ചിട്ടില്ലെന്നാണ് സി.പി.എം നേതൃത്വം പറയുന്നത്.
അതേസമയം, കടുത്ത നടപടി സ്വീകരിച്ചാൽ പാർട്ടിയുമായി ബന്ധപ്പെട്ട ചില രഹസ്യങ്ങൾ ആത്മകഥയിലൂടെ പുറത്തുവിടുമെന്ന സൂചന പത്മകുമാർ അടുത്ത സുഹൃത്തുക്കളോട് നൽകിയിരുന്നുവെന്ന റിപ്പോർട്ടുകൾ രാഷ്ട്രീയ വൃത്തങ്ങളിൽ പ്രചരിച്ചിരുന്നു. പുറത്താക്കലിന് പകരം സസ്പെൻഷനിൽ നടപടി ഒതുങ്ങാൻ ഇതാണ് കാരണമായതെന്ന വിലയിരുത്തലുകളും ഉയർന്നിരുന്നു.
ശബരിമല സ്വർണക്കൊള്ള കേസ് പുറത്തുവന്ന ആദ്യഘട്ടങ്ങളിൽ പത്മകുമാറിനെ പിന്തുണച്ച നിലപാടിലായിരുന്നു സി.പി.എം പത്തനംതിട്ട ജില്ലാ നേതൃത്വം. എന്നാൽ പാർട്ടിയുടെ പ്രതിച്ഛായ സംരക്ഷിക്കാൻ ശക്തമായ നടപടി അനിവാര്യമാണെന്ന അഭിപ്രായം പിന്നീട് ശക്തമായി ഉയർന്നു. ജില്ലാ സെക്രട്ടേറിയറ്റിൽ നിരവധി നേതാക്കൾ കർശന നടപടി വേണമെന്ന് ആവശ്യപ്പെട്ടതായും റിപ്പോർട്ടുകളുണ്ട്.
ഒടുവിൽ സസ്പെൻഷൻ നടപടിയിലേക്ക് നീങ്ങിയ ജില്ലാ സെക്രട്ടേറിയറ്റിന്റെ തീരുമാനം ജില്ലാ കമ്മിറ്റി അംഗീകരിക്കുകയായിരുന്നു. ഇനി അന്വേഷണത്തിലെ നിർണായക രേഖയായ കുറ്റപത്രം ലഭിച്ചതിന് ശേഷമാകും പത്മകുമാറിനെതിരായ തുടർനടപടിയിൽ സി.പി.എം അന്തിമ തീരുമാനമെടുക്കുക.
Leave a Reply