കുവൈത്ത് സിറ്റി: ജൂൺ മൂന്നിന് കുവൈത്ത് അന്താരാഷ്ട്ര വിമാനത്താവളത്തിൽ ഉണ്ടായ ഭീകരാക്രമണത്തിൽ പരിക്കേറ്റ് ജാബർ ആശുപത്രിയിൽ ചികിത്സയിൽ കഴിയുന്ന ഇന്ത്യൻ പൗരന്മാരെ കുവൈത്തിലെ ഇന്ത്യൻ സ്ഥാനപതി പരമിത ത്രിപാഠി സന്ദർശിച്ചു. ചികിത്സയിലുള്ളവരുടെ ആരോഗ്യനില നേരിട്ട് വിലയിരുത്തിയ സ്ഥാനപതി, ഇന്ത്യൻ എംബസിയുടെ ഭാഗത്തുനിന്ന് ആവശ്യമായ എല്ലാ പിന്തുണയും ഉറപ്പുനൽകി.
ആക്രമണത്തെ തുടർന്ന് വിവിധ ആശുപത്രികളിൽ പ്രവേശിപ്പിക്കപ്പെട്ട 13 ഇന്ത്യൻ പൗരന്മാരിൽ ഒൻപത് പേർ ഇതിനകം സുഖം പ്രാപിച്ച് ആശുപത്രി വിട്ടതായി അധികൃതർ അറിയിച്ചു. നിലവിൽ നാല് പേർ മാത്രമാണ് വിദഗ്ധ ചികിത്സയ്ക്കായി ആശുപത്രിയിൽ തുടരുന്നത്.
പരിക്കേറ്റവരുടെ ആരോഗ്യനിലയും രോഗമുക്തിയുടെ പുരോഗതിയും ഇന്ത്യൻ എംബസി തുടർച്ചയായി നിരീക്ഷിച്ചുവരികയാണെന്ന് ഔദ്യോഗിക പ്രസ്താവനയിൽ വ്യക്തമാക്കി. ആശുപത്രി അധികൃതരുമായും ബാധിതരുടെ കുടുംബാംഗങ്ങളുമായും സ്ഥിരമായി ബന്ധം പുലർത്തുന്നുണ്ടെന്നും എംബസി അറിയിച്ചു.
അടിയന്തര സാഹചര്യങ്ങളിൽ ആവശ്യമായ സഹായങ്ങൾ ഏകോപിപ്പിക്കാൻ എംബസി ഉദ്യോഗസ്ഥർ സജ്ജമാണെന്നും കുടുംബങ്ങളുടെ ആശങ്കകൾ പരിഹരിക്കുന്നതിന് പ്രത്യേക ശ്രദ്ധ നൽകുന്നുണ്ടെന്നും സ്ഥാനപതി വ്യക്തമാക്കി. ചികിത്സയിലുള്ള ഇന്ത്യൻ പൗരന്മാർക്ക് ആവശ്യമായ എല്ലാ പിന്തുണയും തുടർന്നും ലഭ്യമാക്കുമെന്ന് എംബസി ഉറപ്പുനൽകി.
Leave a Reply