എറണാകുളം: വ്യക്തിബന്ധങ്ങൾക്കും സൗഹൃദങ്ങൾക്കും എന്നും വലിയ പ്രാധാന്യം നൽകിയിരുന്ന നടൻ സലീം കുമാറിന്റെ ഓർമ്മകൾ പങ്കുവെച്ച് നടൻ സുധീഷ് സുധി. രാഷ്ട്രീയ ഭിന്നതകൾക്കപ്പുറം മനുഷ്യബന്ധങ്ങളെ വിലമതിച്ചിരുന്ന സലീമുമായുള്ള അനുഭവങ്ങളാണ് അദ്ദേഹം കുറിപ്പിലൂടെ പങ്കുവെച്ചത്. കടുത്ത കോൺഗ്രസ് അനുഭാവിയായിരുന്നെങ്കിലും കമ്മ്യൂണിസ്റ്റ് നേതാവ് പി ജയരാജനോടുള്ള ബഹുമാനവും ആരാധനയും സലീം കുമാറിനുണ്ടായിരുന്നുവെന്നും, അദ്ദേഹത്തിന്റെ വ്യക്തമായ രാഷ്ട്രീയ നിലപാടുകളാണ് സലീമിനെ ആകർഷിച്ചതെന്നും സുധീഷ് ഓർക്കുന്നു.
2016-ലെ തിരഞ്ഞെടുപ്പ് കാലത്ത് എറണാകുളത്ത് എത്തിയ പി. ജയരാജനൊപ്പം സുധീഷ് സുധി പറവൂരിലെ സലീം കുമാറിന്റെ വീട്ടിലെത്തിയിരുന്നു. ജയരാജൻ അവിടെ ഉണ്ടെന്ന വിവരം അറിഞ്ഞ മുഖ്യമന്ത്രി സലീമിനെ ഫോണിൽ വിളിച്ച് ‘എന്താ സലീമേ നമ്മളെ വിട്ടുപോവുകയാണോ’ എന്ന് തമാശയായി ചോദിച്ചതായും അദ്ദേഹം ഓർക്കുന്നു. അതിന് സലീം നൽകിയ മറുപടി ‘സതീഷേട്ടൻ പോയാലും ഞാൻ കോൺഗ്രസ് വിടില്ല’ എന്നായിരുന്നു. പിന്നീട് ‘കറുത്ത ജൂതൻ’ സിനിമയുടെ പൂജാ ചടങ്ങിൽ രാഷ്ട്രീയ എതിരാളികളായ കെ സുധാകരനെയും പി ജയരാജനെയും ഒരേ വേദിയിൽ എത്തിക്കാനും സലീമിന് സാധിച്ചു. അന്ന് ‘സലീമിന് വേണ്ടി നമ്മൾ എല്ലാം മറന്ന് ഒന്നിക്കും, സലീമിനെ അടുത്തറിഞ്ഞാൽ നമ്മൾ ഹൃദയത്തോടെ ചേർത്തുപിടിക്കും’ എന്ന് സുധാകരൻ പറഞ്ഞതായും സുധീഷ് ചൂണ്ടിക്കാട്ടുന്നു.
അമൃത ആശുപത്രിയിൽ വെച്ച് സലീം കുമാറിന്റെ ഇളയ മകൻ ആരോമലിനെ കണ്ടപ്പോൾ അവൻ പറഞ്ഞ വാക്കുകൾ ഏറെ വേദനിപ്പിച്ചുവെന്ന് സുധീഷ് കുറിച്ചു. ‘നിങ്ങൾക്ക് രാഷ്ട്രീയം പറഞ്ഞ് അടികൂടാൻ ഇനി അച്ഛനില്ലല്ലോ’ എന്നായിരുന്നു ആരോമലിന്റെ പ്രതികരണം. ‘പറവൂരിലെ വീട്ടിൽ ഞാൻ എന്ന അന്തം കമ്മിയെ കാത്തിരിക്കാൻ ഇനി ആ അന്തം കൊങ്ങി ഇല്ലല്ലോ’ എന്ന വരികളോടെയാണ് സുധീഷ് തന്റെ വികാരനിർഭരമായ കുറിപ്പ് അവസാനിപ്പിക്കുന്നത്. രാഷ്ട്രീയ വ്യത്യാസങ്ങൾ ഉണ്ടായിരുന്നെങ്കിലും ആത്മാർത്ഥമായ സൗഹൃദവും ബന്ധവും എങ്ങനെ നിലനിർത്താമെന്നതിന് ഉദാഹരണമായാണ് ഈ ഓർമ്മകൾ വിലയിരുത്തപ്പെടുന്നത്.
Leave a Reply