ലണ്ടനിൽ നടന്ന ആനന്ദ് ടിവി അവാർഡ്സ് വേദിയിൽ നടൻ മമ്മൂട്ടിയും എം.എൽ.എ കൂടിയായ നടൻ രമേഷ് പിഷാരടിയും തമ്മിൽ നടന്ന രസകരമായ സംഭാഷണമാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്.
ഈ വർഷത്തെ നിയമസഭാ തെരഞ്ഞെടുപ്പിൽ വിജയിച്ച് ജനപ്രതിനിധിയായ ശേഷം പിഷാരടിയും മമ്മൂട്ടിയും ആദ്യമായി ഒരേ വേദിയിൽ എത്തിയപ്പോഴായിരുന്നു സംഭവം. പരിപാടിക്കിടെ താൻ ഒരു എം.എൽ.എ അല്ലെന്ന് മമ്മൂട്ടി തമാശയായി പറഞ്ഞതോടെയാണ് സംഭാഷണം തുടങ്ങിയത്.
അതിന് മറുപടിയായി, മമ്മൂട്ടി യഥാർത്ഥ ജീവിതത്തിൽ എം.എൽ.എ അല്ലെങ്കിലും സിനിമകളിലൂടെ വിവിധ സംസ്ഥാനങ്ങളിലെ മുഖ്യമന്ത്രി കഥാപാത്രങ്ങളെ അനശ്വരമാക്കിയ വ്യക്തിയാണെന്ന് പിഷാരടി പറഞ്ഞു. തമിഴ്, തെലുങ്ക് ചിത്രങ്ങളിലെയും മലയാള സിനിമയായ ‘വൺ’ലെയും മുഖ്യമന്ത്രി വേഷങ്ങൾ അദ്ദേഹം പ്രത്യേകം പരാമർശിക്കുകയും ചെയ്തു.
പിഷാരടിയുടെ വാക്കുകൾക്ക് പിന്നാലെ സദസ്സിൽ ചിരിയുണർത്തിയ മറുപടിയുമായി മമ്മൂട്ടിയും എത്തി. “അഭിനയിക്കാൻ ആർക്കും പറ്റും. പക്ഷേ ഒരു എം.എൽ.എ ആയി ജീവിക്കുക എന്നത് വലിയ പാടുള്ള കാര്യമാണ്” എന്നായിരുന്നു അദ്ദേഹത്തിന്റെ മറുപടി. ഈ പരാമർശം കയ്യടികളോടെയാണ് പ്രേക്ഷകർ സ്വീകരിച്ചത്.
തുടർന്ന് തെരഞ്ഞെടുപ്പ് പ്രചാരണ വേളകളിൽ ‘വൺ’ സിനിമയിലെ ഒരു രാഷ്ട്രീയ ഡയലോഗ് താൻ സ്ഥിരമായി ഉപയോഗിച്ചിരുന്നുവെന്ന് പിഷാരടി വെളിപ്പെടുത്തി. “ജനപ്രതിനിധികൾ ജനങ്ങളെ ഭരിക്കാനല്ല, ജനങ്ങൾക്ക് വേണ്ടി ഭരിക്കാനാണ്” എന്ന ആശയം ഉൾക്കൊള്ളുന്ന ആ ഡയലോഗ് സിനിമയുടെ യഥാർത്ഥ തിരക്കഥയിൽ ഉണ്ടായിരുന്നില്ലെന്നും മമ്മൂട്ടി തന്നെയാണ് അത് ചേർത്തതെന്നും അദ്ദേഹം പറഞ്ഞു.
ഇത് കേട്ട മമ്മൂട്ടി ആ ഡയലോഗ് വേദിയിൽ വീണ്ടും ആവർത്തിക്കുകയും ജനാധിപത്യ ഭരണത്തിന്റെ യഥാർത്ഥ ലക്ഷ്യം ജനങ്ങൾക്ക് വേണ്ടി പ്രവർത്തിക്കുകയാണെന്ന് വ്യക്തമാക്കുകയും ചെയ്തു. ഇരുവരുടെയും സൗഹൃദപരമായ സംഭാഷണം പരിപാടിയിലെ ശ്രദ്ധേയ നിമിഷങ്ങളിലൊന്നായി മാറി.
Leave a Reply