വാഷിങ്ടൺ: ജി7 ഉച്ചകോടിയുടെ ഭാഗമായി പ്രധാനമന്ത്രി നരേന്ദ്ര മോദിയും യു.എസ് പ്രസിഡന്റ് ഡോണൾഡ് ട്രംപും ജൂൺ 17ന് ഉഭയകക്ഷി കൂടിക്കാഴ്ച നടത്തുമെന്ന് വൈറ്റ് ഹൗസ് അറിയിച്ചു. നിലവിൽ പുരോഗമിക്കുന്ന ഇന്ത്യ-അമേരിക്ക വ്യാപാര കരാർ ചർച്ചകളായിരിക്കും കൂടിക്കാഴ്ചയിലെ പ്രധാന അജണ്ട.
2025 ഫെബ്രുവരിയിൽ യു.എസ് സന്ദർശിച്ചപ്പോൾ ട്രംപുമായി കൂടിക്കാഴ്ച നടത്തിയതിന് ശേഷം ഇരുനേതാക്കളും നേരിട്ട് കൂടിക്കാഴ്ച നടത്തുന്നത് ഇതാദ്യമായിരിക്കും. ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ ക്ഷണം സ്വീകരിച്ചാണ് ജൂൺ 16, 17 തീയതികളിൽ നടക്കുന്ന ജി7 ഉച്ചകോടിയിൽ പ്രധാനമന്ത്രി മോദി പങ്കെടുക്കുന്നത്.
ഉച്ചകോടിക്കിടെ ജി7 അംഗരാജ്യങ്ങളുടെയും പങ്കാളി രാജ്യങ്ങളുടെയും നേതാക്കളുമായി മോദി കൂടിക്കാഴ്ച നടത്തും. ആഗോള പങ്കാളിത്തം, സുസ്ഥിര സാമ്പത്തിക വളർച്ച, കൃത്രിമ ബുദ്ധിയുടെ (AI) സുരക്ഷിത വിന്യാസം തുടങ്ങിയ വിഷയങ്ങൾ ചർച്ചകളിൽ പ്രധാന സ്ഥാനമെടുക്കും.
കഴിഞ്ഞ ഏതാനും മാസങ്ങളായി ഇന്ത്യ-അമേരിക്ക ബന്ധത്തിൽ ചില വിഷയങ്ങളിൽ അഭിപ്രായവ്യത്യാസങ്ങൾ നിലനിന്നിരുന്നു. ഇന്ത്യൻ ഉൽപ്പന്നങ്ങൾക്കെതിരായ അമേരിക്കൻ നികുതി നയങ്ങൾ, ഇന്ത്യ-പാകിസ്ഥാൻ വിഷയവുമായി ബന്ധപ്പെട്ട ട്രംപിന്റെ പരാമർശങ്ങൾ, റഷ്യയുമായുള്ള ഇന്ത്യയുടെ ഊർജ വ്യാപാരം എന്നിവ ഇതിൽ ഉൾപ്പെടുന്നു. അതിനാൽ തന്നെ ജി7 വേദിയിലെ ഈ കൂടിക്കാഴ്ചയ്ക്ക് പ്രത്യേക പ്രാധാന്യമുണ്ട്.
ഇറാൻ പ്രതിസന്ധിയും പശ്ചിമേഷ്യയിലെ സംഘർഷാവസ്ഥയും ഇന്ത്യയുടെ സാമ്പത്തിക താൽപര്യങ്ങളെ ബാധിക്കുന്ന സാഹചര്യത്തിലാണ് ഇരുരാജ്യ നേതാക്കളും കൂടിക്കാഴ്ച നടത്തുന്നത്. ഒമാൻ തീരത്തിനടുത്ത് ഇന്ത്യൻ നാവികരുമായി ബന്ധപ്പെട്ട സംഭവവികാസങ്ങൾക്കും ചർച്ചകളിൽ പരാമർശമുണ്ടാകാനിടയുണ്ട്.
ജി7 ഉച്ചകോടിക്ക് മുന്നോടിയായി പ്രധാനമന്ത്രി മോദി ഫ്രാൻസ് സന്ദർശിച്ച് പ്രസിഡന്റ് ഇമ്മാനുവൽ മാക്രോണുമായി ഉഭയകക്ഷി ചർച്ചകൾ നടത്തും. ഇന്ത്യ-ഫ്രാൻസ് തന്ത്രപ്രധാന പങ്കാളിത്തം, സാങ്കേതിക സഹകരണം, നിക്ഷേപം, സ്റ്റാർട്ടപ്പ് മേഖലകളിലെ കൂട്ടായ്മ എന്നിവ ചർച്ചകളിൽ ഉൾപ്പെടും. ‘ഭാരത് ഇന്നൊവേറ്റ്സ്’ എന്ന സംയുക്ത സംരംഭത്തിനും ഇരുനേതാക്കളും തുടക്കമിടും.
തുടർന്ന് പ്രധാനമന്ത്രി മോദി സ്ലൊവാക്യ സന്ദർശിക്കും. 1993-ൽ സ്വാതന്ത്ര്യം നേടിയ ശേഷം ഒരു ഇന്ത്യൻ പ്രധാനമന്ത്രി സ്ലൊവാക്യ സന്ദർശിക്കുന്നത് ചരിത്രത്തിലാദ്യമായിരിക്കും. ജി7 ഉച്ചകോടിക്ക് ശേഷം മോദി വീണ്ടും പാരീസിലെത്തി വിവിധ ഉഭയകക്ഷി കൂടിക്കാഴ്ചകളിലും യൂറോപ്പിലെ പ്രമുഖ സാങ്കേതിക-സ്റ്റാർട്ടപ്പ് മേളയായ ‘വിവാടെക്’ ഉച്ചകോടിയിലും പങ്കെടുക്കും.
Leave a Reply