തെഹ്റാൻ: അമേരിക്കയും ഇറാനും തമ്മിൽ സമാധാനക്കരാർ ഈ വാരാന്ത്യത്തിൽ ഒപ്പുവെക്കുമെന്ന യു.എസ് പ്രസിഡന്റ് ഡോണൾഡ് ട്രംപിന്റെ പ്രസ്താവനയ്ക്ക് പിന്നാലെ വിശദീകരണവുമായി ഇറാൻ. കരാർ സംബന്ധിച്ച ചർച്ചകൾ പുരോഗമിക്കുന്നുണ്ടെങ്കിലും അന്തിമ തീരുമാനത്തിലെത്തിയിട്ടില്ലെന്നാണ് ഇറാൻ വ്യക്തമാക്കിയത്.
സമാധാന ധാരണ യാഥാർഥ്യമായാൽ ഹുർമുസ് കടലിടുക്ക് വീണ്ടും അന്താരാഷ്ട്ര കപ്പൽ ഗതാഗതത്തിനായി തുറന്നുകൊടുക്കുമെന്ന് ട്രംപ് അവകാശപ്പെട്ടിരുന്നു. എന്നാൽ ചർച്ചകൾ ഇപ്പോഴും പൂർത്തിയായിട്ടില്ലെന്നും രാജ്യത്തിന്റെ നയപരമായ താത്പര്യങ്ങളെ ബാധിക്കുന്ന വിട്ടുവീഴ്ചകൾക്ക് തയ്യാറല്ലെന്നും ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഖായി പറഞ്ഞു.
കരാർ സംബന്ധിച്ച വിഷയങ്ങൾ നിലവിൽ രാജ്യത്തെ ഉന്നതതല തീരുമാനമെടുക്കുന്ന സമിതികളുടെ പരിഗണനയിലാണെന്നും അദ്ദേഹം കൂട്ടിച്ചേർത്തു. അതിനാൽ അന്തിമ തീരുമാനമെടുത്തുവെന്ന തരത്തിലുള്ള റിപ്പോർട്ടുകൾ ശരിയല്ലെന്നാണ് ഇറാന്റെ നിലപാട്.
ഇറാനെതിരായ സൈനിക നടപടികൾ താൽക്കാലികമായി നിർത്തിവെച്ചതായും ചർച്ചകളിൽ ഗണ്യമായ പുരോഗതി ഉണ്ടായതായും ട്രംപ് നേരത്തെ വ്യക്തമാക്കിയിരുന്നു. അമേരിക്കയ്ക്ക് വേണ്ടി വൈസ് പ്രസിഡന്റ് ജെ.ഡി. വാൻസ് കരാറിൽ ഒപ്പുവെക്കുമെന്നും അദ്ദേഹം പറഞ്ഞിരുന്നു.
ഫെബ്രുവരി അവസാനത്തോടെ ആരംഭിച്ച സൈനിക സംഘർഷങ്ങൾക്ക് ശേഷം ഇരുരാജ്യങ്ങളും തമ്മിൽ പലതവണ സംഘർഷാവസ്ഥ രൂപപ്പെട്ടിരുന്നു. വെടിനിർത്തൽ പ്രഖ്യാപനങ്ങൾ ഉണ്ടായിരുന്നെങ്കിലും പിന്നീട് ആക്രമണങ്ങളും പ്രത്യാക്രമണങ്ങളും തുടരുകയായിരുന്നു.
ഹുർമുസ് കടലിടുക്കിനോട് ചേർന്ന മേഖലകളിൽ ഉണ്ടായ സൈനിക സംഭവവികാസങ്ങൾ സംഘർഷം കൂടുതൽ രൂക്ഷമാക്കി. അമേരിക്കൻ സൈനിക നീക്കങ്ങൾക്ക് പിന്നാലെ ഇറാനും വിവിധ യു.എസ് സൈനിക കേന്ദ്രങ്ങൾ ലക്ഷ്യമിട്ട് മിസൈൽ, ഡ്രോൺ ആക്രമണങ്ങൾ നടത്തിയിരുന്നു.
അതേസമയം, അമേരിക്കയിലെ ഇന്ധനവില വർധനയും ആഭ്യന്തര രാഷ്ട്രീയ സമ്മർദങ്ങളും ട്രംപ് ഭരണകൂടത്തെ വേഗത്തിൽ സമാധാന ധാരണയിലെത്താൻ പ്രേരിപ്പിക്കുന്ന ഘടകങ്ങളായി വിലയിരുത്തപ്പെടുന്നുണ്ട്.
സമാധാനക്കരാറിന് മേഖലയിലെ ചില രാജ്യങ്ങളുടെ പിന്തുണയുണ്ടെന്ന് ട്രംപ് അവകാശപ്പെട്ടിരുന്നുവെങ്കിലും, ഈ ചർച്ചകളുടെ ഭാഗമല്ലെന്ന നിലപാടാണ് ഇസ്രായേൽ വ്യക്തമാക്കിയിരിക്കുന്നത്.
Leave a Reply