കോഴിക്കോട്: നിപ ബാധ റിപ്പോർട്ട് ചെയ്ത ഫറോക്ക്-രാമനാട്ടുകര മേഖലയിലെ ആളുകളുമായി ബന്ധപ്പെടാൻ അനുവദിക്കുന്നില്ലെന്ന് ആരോപിച്ച് കോഴിക്കോട് നിപ കൺട്രോൾ റൂമിന് മുന്നിൽ പ്രതിഷേധവുമായി മുൻ മന്ത്രിയും ബേപ്പൂർ എം.എൽ.എയുമായ പി.എ മുഹമ്മദ് റിയാസ്.
കോഴിക്കോട് കലക്ട്രേറ്റിൽ പ്രവർത്തിക്കുന്ന നിപ കൺട്രോൾ റൂമിന് മുന്നിലിരുന്നാണ് റിയാസ് പ്രതിഷേധം സംഘടിപ്പിച്ചത്. തന്റെ മണ്ഡലത്തിലെ നിപ ബാധിത പ്രദേശങ്ങളിലെ ആളുകളെ കൺട്രോൾ റൂമിൽ നിന്ന് നേരിട്ട് വിളിച്ച് വിവരങ്ങൾ അന്വേഷിക്കാൻ അനുമതി നിഷേധിക്കുകയാണെന്നാണ് അദ്ദേഹത്തിന്റെ ആരോപണം.
കഴിഞ്ഞ ദിവസവും ഇന്നും ഇതേ ആവശ്യവുമായി കലക്ട്രേറ്റിലെത്തിയിരുന്നുവെങ്കിലും അനുമതി ലഭിച്ചില്ലെന്ന് റിയാസ് പറഞ്ഞു. ഇത്തരം വിളികൾ അനുവദിക്കേണ്ടതില്ലെന്ന നിലപാടാണ് ആരോഗ്യവകുപ്പ് സ്വീകരിച്ചതെന്നും അതാണ് ജില്ലാ കലക്ടർ അറിയിച്ചതെന്നും അദ്ദേഹം ആരോപിച്ചു.
ജനപ്രതിനിധിയായ തനിക്ക് പ്രദേശവാസികളുമായി സംസാരിക്കാനും അവരുടെ പ്രശ്നങ്ങൾ മനസ്സിലാക്കാനും അവസരം നിഷേധിക്കുന്നത് രാഷ്ട്രീയപരമായ സമീപനമാണെന്ന് റിയാസ് വിമർശിച്ചു. മുൻ നിപ പ്രതിരോധ പ്രവർത്തനങ്ങളിലുടനീളം ജനപ്രതിനിധികൾ കൺട്രോൾ റൂമിൽ നിന്ന് ആളുകളെ വിളിച്ച് വിവരങ്ങൾ ശേഖരിക്കുകയും ആത്മവിശ്വാസം പകരുകയും ചെയ്തിരുന്നുവെന്നും അദ്ദേഹം ചൂണ്ടിക്കാട്ടി.
“ഞാൻ ഇന്നലെയും ഇന്നും കൺട്രോൾ റൂമിലെത്തി. എന്നാൽ ആളുകളെ വിളിക്കാനോ ഉദ്യോഗസ്ഥർ നടത്തുന്ന ആശയവിനിമയം നിരീക്ഷിക്കാനോ അനുവദിച്ചില്ല. എന്തിനാണ് വിവരങ്ങൾ മറച്ചുവെക്കുന്നത്?” എന്ന് റിയാസ് ചോദിച്ചു.
ഇതിനിടെ, നിപ പ്രതിരോധ പ്രവർത്തനങ്ങളുടെ പശ്ചാത്തലത്തിൽ കോഴിക്കോട് പുതിയ രാഷ്ട്രീയ വിവാദത്തിനും സംഭവം വഴിവെച്ചിരിക്കുകയാണ്. മുൻ വർഷങ്ങളിലേതുപോലെ ഇത്തവണയും ജനപ്രതിനിധികൾക്ക് ഇടപെടൽ അവസരം നൽകണമെന്നാണ് റിയാസിന്റെ ആവശ്യം.
അതേസമയം, നിലവിൽ കണ്ടെയ്ൻമെന്റ് സോൺ പ്രഖ്യാപിച്ചിട്ടില്ലെന്നും സമ്പർക്കപ്പട്ടികയിലുള്ളവരെ ആരോഗ്യവകുപ്പ് ഉദ്യോഗസ്ഥർ ദിവസേന രണ്ട് തവണ ബന്ധപ്പെടുന്നുണ്ടെന്നുമാണ് റിയാസിന് അധികൃതർ നൽകിയ വിശദീകരണം. ആരോഗ്യവകുപ്പിന്റെ പരിപാടികളുമായി ബന്ധപ്പെട്ട് ഭരണപക്ഷവും പ്രതിപക്ഷവും തമ്മിലുള്ള വിവാദങ്ങൾ തുടരുന്നതിനിടെയാണ് പുതിയ ആരോപണവും പ്രതിഷേധവും ഉയർന്നിരിക്കുന്നത്.
Leave a Reply