തിരുവനന്തപുരം: സ്ത്രീകൾക്കുള്ള ‘പ്രിയദർശിനി’ സൗജന്യയാത്രാ പദ്ധതിയുമായി ബന്ധപ്പെട്ട് ഉയർന്ന വിവാദങ്ങൾക്ക് മറുപടിയുമായി കെ.എസ്.ആർ.ടി.സി. സൗജന്യയാത്ര ലഭ്യമല്ലാത്ത സിറ്റി ഫാസ്റ്റ് ബസുകളിൽ സ്റ്റിക്കർ പതിപ്പിച്ചതിനെതിരെ ഉയർന്ന വിമർശനങ്ങളോടെയാണ് അധികൃതർ വിശദീകരണം നൽകിയത്.
സിറ്റി ഫാസ്റ്റ് ബസുകളിൽ പതിപ്പിച്ച സ്റ്റിക്കറുകൾ പദ്ധതി ലഭ്യമാണെന്ന തോന്നൽ സൃഷ്ടിക്കാനല്ലെന്നും, യാത്രക്കാർക്ക് ബസുകൾ തിരിച്ചറിയാനുള്ള സൗകര്യത്തിനായാണ് അവ ഉപയോഗിച്ചതെന്നും തിരുവനന്തപുരം സിറ്റി ഡിപ്പോ അധികൃതർ അറിയിച്ചു.
നിലവിൽ തിരുവനന്തപുരം സിറ്റി ഡിപ്പോയിൽ 34 ഓർഡിനറി ബസുകളാണ് സർവീസ് നടത്തുന്നത്. ഇവയിലൊക്കെയും ‘പ്രിയദർശിനി സ്ത്രീ സൗജന്യയാത്ര’ എന്ന അടയാളപ്പെടുത്തൽ നൽകിയിട്ടുണ്ട്. ഇതിന് പുറമെ സർവീസ് നടത്തുന്ന 47 സിറ്റി ഫാസ്റ്റ് ബസുകളിലാണ് തിരിച്ചറിയൽ സ്റ്റിക്കറുകൾ മാത്രം പതിപ്പിച്ചിരിക്കുന്നത്.
സർക്കാർ പ്രഖ്യാപിച്ച സൗജന്യയാത്രാ പദ്ധതി ഓർഡിനറി വിഭാഗം ബസുകൾക്ക് മാത്രമാണ് ബാധകമെന്ന് കെ.എസ്.ആർ.ടി.സി വീണ്ടും വ്യക്തമാക്കി. സിറ്റി ഫാസ്റ്റ്, ഫാസ്റ്റ് പാസഞ്ചർ, മറ്റ് ഉയർന്ന ക്ലാസ് സർവീസുകൾ എന്നിവ പദ്ധതിയുടെ പരിധിയിൽ ഉൾപ്പെടുന്നില്ല.
ഓർഡിനറി, സിറ്റി ഓർഡിനറി, ലിമിറ്റഡ് സ്റ്റോപ്പ് ഓർഡിനറി, പോയിന്റ് ടു പോയിന്റ്, ഗ്രാമവണ്ടി, ഫെയർ സ്റ്റേജ് ലിമിറ്റഡ് സ്റ്റോപ്പ്, ടൗൺ ടു ടൗൺ ലിമിറ്റഡ് സ്റ്റോപ്പ് വിഭാഗങ്ങളിലെ ബസുകളിലാണ് സ്ത്രീകൾക്ക് സൗജന്യയാത്ര അനുവദിച്ചിരിക്കുന്നത്.
തിരുവനന്തപുരം ജില്ലയിൽ ആകെ 687 ഓർഡിനറി ബസുകളും നഗരപരിധിയിൽ 384 സിറ്റി ഫാസ്റ്റ് ബസുകളും സർവീസ് നടത്തുന്നുണ്ടെന്നാണ് കെ.എസ്.ആർ.ടി.സി കണക്കുകൾ. സിറ്റി ഫാസ്റ്റ് സർവീസുകൾക്ക് പ്രത്യേക നിരക്ക് ഘടനയുള്ളതിനാലാണ് അവയെ നിലവിലെ പദ്ധതിയിൽ ഉൾപ്പെടുത്താതിരുന്നതെന്ന് അധികൃതർ അറിയിച്ചു.
Leave a Reply