ജോർഹട്ട്: അസമിലെ ജോർഹട്ട് വ്യോമതാവളത്തിൽ ഇന്ത്യൻ വ്യോമസേനയുടെ എ.എൻ-32 വിമാനം അപകടത്തിൽപ്പെട്ടു. ശനിയാഴ്ച രാവിലെ ലാൻഡിങ് നടപടികൾക്കിടെയായിരുന്നു സംഭവം നടന്നതെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്. അപകടത്തിന് പിന്നാലെ വിമാനത്തിൽ തീപിടുത്തമുണ്ടായി.
റൗരിയ വ്യോമതാവള പരിധിക്കുള്ളിൽ തന്നെയാണ് വിമാനം തകർന്നുവീണത്. വിവരം ലഭിച്ചതോടെ അഗ്നിശമന സേനയും രക്ഷാപ്രവർത്തക സംഘങ്ങളും സ്ഥലത്തെത്തി തീയണക്കാനുള്ള പ്രവർത്തനങ്ങൾ ആരംഭിച്ചു. അപകടത്തിന് കാരണമായ സാഹചര്യം ഇതുവരെ വ്യക്തമല്ല. വിമാനത്തിലുണ്ടായിരുന്നവരുടെ എണ്ണം, പരിക്കുകൾ, മറ്റ് നാശനഷ്ടങ്ങൾ എന്നിവ സംബന്ധിച്ച ഔദ്യോഗിക വിവരങ്ങൾ പുറത്തുവിട്ടിട്ടില്ല. സംഭവത്തിൽ വ്യോമസേന അന്വേഷണത്തിന് ഉത്തരവിട്ടിട്ടുണ്ട്. സ്ഥിതിഗതികൾ വിലയിരുത്തിയ ശേഷം കൂടുതൽ വിവരങ്ങൾ പുറത്തുവിടുമെന്ന് ബന്ധപ്പെട്ട വൃത്തങ്ങൾ അറിയിച്ചു.
ഇന്ത്യൻ വ്യോമസേനയുടെ ഗതാഗത വിഭാഗത്തിലെ പ്രധാന വിമാനങ്ങളിലൊന്നാണ് ആന്റനോവ് എ.എൻ-32. മുൻ സോവിയറ്റ് യൂണിയനിൽ ഇന്ത്യയുടെ ആവശ്യങ്ങൾ പരിഗണിച്ച് രൂപകൽപ്പന ചെയ്ത ഈ ഇരട്ട എൻജിൻ വിമാനങ്ങൾ ഉയർന്ന മലനിരകളിലും പ്രതികൂല കാലാവസ്ഥയിലും പ്രവർത്തിക്കാൻ അനുയോജ്യമാണ്. രാജ്യത്തിന്റെ അതിർത്തി മേഖലകളിലേക്ക് സൈനികരെയും സാമഗ്രികളെയും എത്തിക്കുന്നതിൽ ഇവ നിർണായക പങ്ക് വഹിക്കുന്നു. ഏകദേശം 7.5 ടൺ ചരക്ക് വഹിക്കാൻ ശേഷിയുള്ള വിമാനത്തിന് 50 യാത്രക്കാരെയോ 42 പാരാട്രൂപ്പർമാരെയോ ഒരേസമയം കൊണ്ടുപോകാൻ കഴിയും.
അടുത്തകാലത്ത് അസമിൽ റിപ്പോർട്ട് ചെയ്യുന്ന രണ്ടാമത്തെ വലിയ വ്യോമാപകടമാണിത്. ഇതിന് മുമ്പ് ജോർഹട്ടിന് സമീപമുള്ള കർബി ആങ്ലോംഗ് ജില്ലയിൽ വ്യോമസേനയുടെ സുഖോയ്-30 എം.കെ.ഐ യുദ്ധവിമാനം തകർന്നുവീണ് രണ്ട് പൈലറ്റുമാർ മരിച്ചിരുന്നു. മാർച്ച് അഞ്ചിന് ജോർഹട്ട് വ്യോമതാവളത്തിൽ നിന്ന് പറന്നുയർന്ന വിമാനം സാങ്കേതിക തകരാറിനെ തുടർന്ന് കാണാതാകുകയും പിന്നീട് കർബി ആങ്ലോംഗിലെ ഉൾപ്രദേശത്ത് തകർന്ന നിലയിൽ കണ്ടെത്തുകയും ചെയ്തിരുന്നു.
ജോർഹട്ട് വ്യോമതാവളത്തിൽ വീണ്ടും വിമാനാപകടം റിപ്പോർട്ട് ചെയ്തതോടെ സുരക്ഷാ ക്രമീകരണങ്ങളെയും പ്രവർത്തന സംവിധാനങ്ങളെയും കുറിച്ച് ആശങ്ക ഉയർന്നിട്ടുണ്ട്. അപകടത്തിന്റെ എല്ലാ വശങ്ങളും പരിശോധിച്ച് സമഗ്ര അന്വേഷണം നടത്തുമെന്ന് അധികൃതർ അറിയിച്ചു.
Leave a Reply