കൊൽക്കത്ത: പശ്ചിമബംഗാളിൽ നിയമസഭാ തെരഞ്ഞെടുപ്പിൽ ഉപയോഗിച്ചിരുന്ന ഏകദേശം നാലായിരത്തോളം ഇലക്ട്രോണിക് വോട്ടിങ് യന്ത്രങ്ങൾ (ഇവിഎം) തീപിടിത്തത്തിൽ കത്തിനശിച്ച സംഭവത്തെ തുടർന്ന് വലിയ രാഷ്ട്രീയ വിവാദം ഉയർന്നു. തെക്കൻ കൊൽക്കത്തയിലെ ഒൻപത് നിലകളുള്ള ഒരു സർക്കാർ കെട്ടിടത്തിലുണ്ടായ തീപിടിത്തത്തിലാണ് വൻ നാശനഷ്ടം റിപ്പോർട്ട് ചെയ്തത്.
തിരഞ്ഞെടുപ്പ് ഫലപ്രഖ്യാപനത്തിന് പിന്നാലെ വോട്ടിങ് യന്ത്രങ്ങൾ നശിച്ചതിന് പിന്നിൽ ദുരൂഹതയുണ്ടെന്ന് ആരോപിച്ച് തൃണമൂൽ കോൺഗ്രസും ബിജെപിയും പരസ്പരം കുറ്റപ്പെടുത്തുകയാണ്. ഏകദേശം ഏഴ് മണ്ഡലങ്ങളുമായി ബന്ധപ്പെട്ട ഇവിഎമ്മുകൾ ആസൂത്രിതമായി നശിപ്പിച്ചതാണെന്നാണ് തൃണമൂൽ കോൺഗ്രസിന്റെ ആരോപണം.
അതേസമയം, സംഭവത്തിന് പിന്നിൽ തൃണമൂൽ കോൺഗ്രസിന്റെ ഗൂഢാലോചനയുണ്ടാകാമെന്നാണ് ബിജെപി ആരോപിക്കുന്നത്. ഇവിഎമ്മുകൾ കത്തിനശിച്ചതുമായി ബന്ധപ്പെട്ട യഥാർഥ കാരണം പുറത്തുകൊണ്ടുവരണമെന്ന് ഇരുപാർട്ടികളും ആവശ്യപ്പെട്ടിട്ടുണ്ട്.
രാഷ്ട്രീയ ആരോപണപ്രത്യാരോപണങ്ങൾ ശക്തമാകുന്നതിനിടെ സംഭവത്തെക്കുറിച്ച് സമഗ്ര അന്വേഷണം നടത്താൻ പശ്ചിമബംഗാൾ സർക്കാർ ഉന്നതതല അന്വേഷണത്തിന് ഉത്തരവിട്ടു. തീപിടിത്തത്തിന്റെ കാരണം, സുരക്ഷാ വീഴ്ചകൾ, നശിച്ച ഇവിഎമ്മുകളുടെ കൃത്യമായ എണ്ണം എന്നിവ ഉൾപ്പെടെ വിവിധ കാര്യങ്ങൾ അന്വേഷണപരിധിയിൽ ഉൾപ്പെടുത്തുമെന്നാണ് വിവരം.
Leave a Reply