തിരുവനന്തപുരം: സംസ്ഥാനത്ത് വീണ്ടും നിപ വൈറസ് ബാധ സ്ഥിരീകരിച്ച സാഹചര്യത്തിൽ രോഗത്തെ ഒറ്റക്കെട്ടായി നേരിടണമെന്ന് ആഹ്വാനം ചെയ്ത് മുൻ ആരോഗ്യ മന്ത്രി വീണ ജോർജ്. കോഴിക്കോട് മെഡിക്കൽ കോളേജിലെ മൈക്രോബയോളജി ലാബിൽ നടത്തിയ ആർടിപിസിആർ പരിശോധനയിലാണ് രോഗബാധ കണ്ടെത്തിയിരിക്കുന്നത്. പൂനെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയുടെ അന്തിമ സ്ഥിരീകരണത്തിനായി കാത്തുനിൽക്കാതെ നിലവിലെ പരിശോധനാ ഫലത്തിന്റെ അടിസ്ഥാനത്തിൽ പ്രതിരോധ നടപടികൾ ശക്തമാക്കേണ്ടതുണ്ടെന്ന് അവർ അഭിപ്രായപ്പെട്ടു.
രോഗിക്ക് ആവശ്യമായ ചികിത്സ ഉറപ്പാക്കുന്നതിനോടൊപ്പം രോഗവ്യാപനം തടയുന്നതിനുള്ള കർശന നടപടികളും സ്വീകരിക്കേണ്ടതുണ്ടെന്ന് വീണ ജോർജ് പറഞ്ഞു. മുൻകാല അനുഭവങ്ങളുടെ അടിസ്ഥാനത്തിൽ കേരളം ശാസ്ത്രീയമായി രൂപപ്പെടുത്തിയ ചികിത്സാ മാർഗരേഖകളും പ്രതിരോധ സംവിധാനങ്ങളും കൈവശമുണ്ടെന്നും പ്രതിസന്ധി ഘട്ടങ്ങളിൽ ജനപങ്കാളിത്തത്തോടെയുള്ള ശാസ്ത്രീയ പ്രതിരോധമാണ് സ്വീകരിക്കേണ്ട സമീപനമെന്നും അവർ വ്യക്തമാക്കി.
നിപയുമായി ബന്ധപ്പെട്ട് നിലവിലെ ആരോഗ്യ മന്ത്രി കെ. മുരളീധരൻ മുമ്പ് നടത്തിയ പ്രസംഗം പലരും ശ്രദ്ധയിൽപ്പെടുത്തിയിട്ടുണ്ടെന്ന് വീണ ജോർജ് പറഞ്ഞു. എന്നാൽ അതിനെ ചുറ്റിപ്പറ്റിയുള്ള രാഷ്ട്രീയ വിവാദങ്ങളിൽ താൻ പങ്കെടുക്കില്ലെന്നും ശരിയും തെറ്റും കാലം തെളിയിക്കട്ടെയെന്നും അവർ കൂട്ടിച്ചേർത്തു. ഇത്തരം സാഹചര്യങ്ങളിൽ എല്ലാവരും ഒന്നിച്ച് നിന്ന് പകർച്ചവ്യാധിക്കെതിരെ പോരാടുകയാണ് പ്രധാനമെന്നും അവർ ഓർമ്മിപ്പിച്ചു.
സംസ്ഥാനത്ത് റിപ്പോർട്ട് ചെയ്യപ്പെടുന്ന ഷിഗെല്ല കേസുകളെയും ഗൗരവത്തോടെ കാണേണ്ടതുണ്ടെന്ന് മുൻ ആരോഗ്യ മന്ത്രി ചൂണ്ടിക്കാട്ടി. കേരളത്തിൽ ഇത്രയും വ്യാപകമായി ഷിഗെല്ല കേസുകൾ റിപ്പോർട്ട് ചെയ്യപ്പെടുന്നത് ആദ്യമായാണെന്നും കുഞ്ഞുങ്ങൾ, പ്രായമായവർ, മറ്റ് ആരോഗ്യപ്രശ്നങ്ങളുള്ളവർ എന്നിവരിൽ രോഗം കൂടുതൽ ഗുരുതരമാകാൻ സാധ്യതയുണ്ടെന്നും അവർ പറഞ്ഞു. രോഗത്തിന്റെ സാമൂഹിക വ്യാപനം തടയാൻ ആവശ്യമായ മുൻകരുതലുകൾ സ്വീകരിക്കണമെന്നും അവർ ആവശ്യപ്പെട്ടു.
മുരളീധരന്റെ പഴയ പ്രസംഗം വീണ്ടും ചർച്ചയിൽ
2021ൽ നടത്തിയ ഒരു പ്രസംഗത്തിൽ കേരളത്തിലെ ഭരണത്തെ വിമർശിച്ചുകൊണ്ട് കെ. മുരളീധരൻ നടത്തിയ പരാമർശങ്ങളാണ് ഇപ്പോൾ വീണ്ടും സാമൂഹിക മാധ്യമങ്ങളിൽ ചർച്ചയാകുന്നത്. അന്ന് നിപ രോഗബാധയെ പരാമർശിച്ച അദ്ദേഹം, മുൻ മുഖ്യമന്ത്രിമാരുടെ കാലത്തും വവ്വാലുകൾ ഉണ്ടായിരുന്നുവെങ്കിലും ഇപ്പോഴാണ് രോഗം വ്യാപകമായി റിപ്പോർട്ട് ചെയ്യപ്പെടുന്നതെന്ന് ചൂണ്ടിക്കാട്ടിയിരുന്നു. ആ പ്രസംഗത്തിന്റെ പശ്ചാത്തലത്തിൽ, ആരോഗ്യ മന്ത്രിയുടെ നിലപാട് ഇപ്പോഴും അതേപോലെയാണോ എന്ന ചോദ്യവും സാമൂഹിക മാധ്യമങ്ങളിൽ ഉയരുന്നുണ്ട്.
Leave a Reply