തിരുവനന്തപുരം: സംസ്ഥാനത്ത് വാർഷിക ട്രോളിങ് നിരോധനം ചൊവ്വാഴ്ച അർധരാത്രി മുതൽ പ്രാബല്യത്തിൽ വരും. ഇതിന്റെ ഭാഗമായി യന്ത്രവത്കൃത മത്സ്യബന്ധന ബോട്ടുകൾ വൈകുന്നേരത്തോടെ മത്സ്യബന്ധന പ്രവർത്തനങ്ങൾ അവസാനിപ്പിച്ച് കരയിലേക്ക് മടങ്ങും.
ട്രോളിങ് നിരോധനം ആരംഭിക്കുന്നതോടെ അടുത്ത 52 ദിവസത്തേക്ക് ബോട്ടുകൾ അറ്റകുറ്റപ്പണികൾക്കും പരിപാലന പ്രവർത്തനങ്ങൾക്കുമായി ഉപയോഗിക്കും. ബുധനാഴ്ച മുതൽ ചെറുവള്ളങ്ങളും പരമ്പരാഗത മത്സ്യബന്ധന യാനങ്ങളുമാണ് കടലിൽ മത്സ്യബന്ധനത്തിനിറങ്ങുക.
ജൂലൈ 31 അർധരാത്രിവരെ തുടരുന്ന ട്രോളിങ് നിരോധനം യന്ത്രവത്കൃത മത്സ്യബന്ധന ബോട്ടുകൾക്കാണ് ബാധകമാകുന്നത്. അതേസമയം, ചെറുവള്ളങ്ങൾക്കും പരമ്പരാഗത മത്സ്യത്തൊഴിലാളികൾക്കും മത്സ്യബന്ധനത്തിന് വിലക്കുണ്ടാകില്ല.
നിരോധനത്തെ തുടർന്ന് യന്ത്രവത്കൃത ബോട്ടുകളെ ആശ്രയിച്ച് ജോലി ചെയ്യുന്ന മത്സ്യത്തൊഴിലാളികളും അനുബന്ധ മേഖലകളിലെ തൊഴിലാളികളും ഉൾപ്പെടെ ആയിരക്കണക്കിന് പേർക്ക് താൽക്കാലികമായി തൊഴിൽ നഷ്ടമാകും. ഇവർക്കായി സൗജന്യ റേഷൻ വിതരണം ചെയ്യുന്നതിന് സിവിൽ സപ്ലൈസ് വകുപ്പുമായി സഹകരിച്ച് നടപടി സ്വീകരിച്ചതായി ഫിഷറീസ് വകുപ്പ് അറിയിച്ചു.
2007-ലെ കേരള സമുദ്ര മത്സ്യബന്ധന നിയന്ത്രണ-സംരക്ഷണ നിയമപ്രകാരം സംസ്ഥാന തീരക്കടലിൽ പരമ്പരാഗത മത്സ്യത്തൊഴിലാളികൾക്ക് മത്സ്യബന്ധനം തുടരുന്നതിന് തടസ്സമുണ്ടാകില്ല. മത്സ്യസമ്പത്ത് സംരക്ഷിക്കുന്നതിനും മത്സ്യങ്ങളുടെ പ്രജനന കാലയളവിന് അനുകൂല സാഹചര്യം ഒരുക്കുന്നതിനുമാണ് ട്രോളിങ് നിരോധനം ഏർപ്പെടുത്തുന്നത്.
ഇതിനുപുറമെ, പശ്ചിമ തീരത്തെ പ്രത്യേക സാമ്പത്തിക മേഖലയായ എക്സ്ക്ലൂസീവ് ഇക്കണോമിക് സോണിൽ ജൂലൈ 31 വരെ 61 ദിവസത്തേക്ക് പരമ്പരാഗത യാനങ്ങൾ ഒഴികെയുള്ള എല്ലാ മത്സ്യബന്ധന പ്രവർത്തനങ്ങൾക്കും കേന്ദ്ര സർക്കാർ നിരോധനം ഏർപ്പെടുത്തിയിട്ടുണ്ട്.
Leave a Reply