ന്യൂഡൽഹി: ഇൻഡ്യ മുന്നണിയുടെ നിർണായക യോഗത്തിൽ സഖ്യത്തിലെ ഏറ്റവും വലിയ കക്ഷിയായ കോൺഗ്രസിനെതിരെ വിവിധ ഘടകകക്ഷികൾ കടുത്ത വിമർശനങ്ങൾ ഉന്നയിച്ചു. കേരള നിയമസഭാ തെരഞ്ഞെടുപ്പിനിടെ ഉയർന്ന രാഷ്ട്രീയ ആരോപണങ്ങളും രാജ്യസഭ സ്ഥാനാർഥി പ്രഖ്യാപനവുമായി ബന്ധപ്പെട്ട വിവാദങ്ങളുമാണ് പ്രധാനമായും ചർച്ചയായത്.
കേരളത്തിലെ തെരഞ്ഞെടുപ്പ് പ്രചാരണ വേളയിൽ കോൺഗ്രസ് നേതാക്കൾ സി.പി.എമ്മിനെതിരെ ഉന്നയിച്ച ബി.ജെ.പി-ഡീൽ ആരോപണങ്ങളെ സി.പി.എം പ്രതിനിധികൾ ശക്തമായി ചോദ്യം ചെയ്തു. അതേസമയം, രാജ്യസഭ തെരഞ്ഞെടുപ്പിലെ സ്ഥാനാർഥി നിർണയത്തിൽ ഏകപക്ഷീയ സമീപനം സ്വീകരിച്ചെന്ന ആരോപണം ജെ.എം.എം യോഗത്തിൽ ഉന്നയിച്ചു.
കോൺഗ്രസുമായുള്ള അഭിപ്രായവ്യത്യാസങ്ങളെ തുടർന്ന് സഖ്യത്തിൽ നിന്ന് അകന്നുനിൽക്കുന്ന ഡി.എം.കെയെ വീണ്ടും മുന്നണിയിലേക്ക് തിരികെ കൊണ്ടുവരണമെന്ന ആവശ്യം ഭൂരിഭാഗം ഘടകകക്ഷികളും മുന്നോട്ടുവച്ചു. വിമർശനങ്ങൾ ഉൾക്കൊള്ളുന്നുവെന്ന് കോൺഗ്രസ് നേതൃത്വം പ്രതികരിച്ചെങ്കിലും ഡി.എം.കെ വിഷയത്തിൽ വ്യക്തമായ നിലപാട് സ്വീകരിച്ചില്ല.
പശ്ചിമ ബംഗാളിൽ പ്രതിപക്ഷ കക്ഷികൾ ഒന്നിച്ചുനിന്ന് പ്രവർത്തിക്കണമെന്ന് തൃണമൂൽ കോൺഗ്രസ് നേതാവ് മമത ബാനർജി ആവശ്യപ്പെട്ടു. ഇതിനോട് പ്രതികരിച്ച രാഹുൽ ഗാന്ധി, കഴിഞ്ഞ തെരഞ്ഞെടുപ്പിൽ തന്നെ സമാനമായ ഐക്യം സാധ്യമായിരുന്നുവെന്നും അങ്ങനെ സംഭവിച്ചിരുന്നെങ്കിൽ ബി.ജെ.പിക്ക് അധികാരത്തിലെത്താൻ കഴിയുമായിരുന്നില്ലെന്നും അഭിപ്രായപ്പെട്ടു.
ബംഗാളിൽ കോൺഗ്രസിന് പരിമിതമായ സീറ്റുകൾ മാത്രമാണ് നൽകാൻ തൃണമൂൽ കോൺഗ്രസ് തയ്യാറായതെന്ന് രാഹുൽ ഗാന്ധി ചൂണ്ടിക്കാട്ടി. അതേസമയം, ബി.ജെ.പി വിവിധ പ്രതിപക്ഷ നേതാക്കളെയും ജനപ്രതിനിധികളെയും നേരിട്ട് സമീപിച്ച് സ്വാധീനിക്കാൻ ശ്രമിക്കുകയാണെന്ന് മമത ബാനർജി ആരോപിച്ചു.
യോഗങ്ങൾ കൃത്യമായ ഇടവേളകളിൽ വിളിച്ചുചേർക്കാത്തത് സഖ്യത്തിന്റെ പ്രവർത്തനത്തെ ബാധിക്കുന്നുവെന്ന് ശിവസേന (ഉദ്ധവ് വിഭാഗം) നേതാവ് ഉദ്ധവ് താക്കറെ ചൂണ്ടിക്കാട്ടി. കേന്ദ്ര സർക്കാരിന്റെ നയങ്ങൾക്കെതിരെ കൂടുതൽ ഏകോപിതവും ശക്തവുമായ പ്രതിപക്ഷ നീക്കങ്ങൾ ആവശ്യമാണ് എന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ അഭിപ്രായപ്പെട്ടു.
ഇൻഡ്യ മുന്നണി യോഗത്തിലെ പ്രധാന തീരുമാനങ്ങൾ
- വോട്ടർപട്ടിക പുതുക്കലിലും തെരഞ്ഞെടുപ്പ് നടപടികളിലും ക്രമക്കേടുകൾ ഉണ്ടായെന്ന ആരോപണം ഉന്നയിച്ച് സുപ്രീംകോടതി ചീഫ് ജസ്റ്റിസിന് സംയുക്ത കത്ത് നൽകും.
- നീറ്റ്, സി.ബി.എസ്.ഇ പരീക്ഷാ ക്രമക്കേടുകളുടെ പശ്ചാത്തലത്തിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്ന് ആവശ്യപ്പെടും.
- സാമ്പത്തിക പ്രതിസന്ധി, വിലക്കയറ്റം, തൊഴിലില്ലായ്മ, കാർഷിക മേഖല നേരിടുന്ന പ്രശ്നങ്ങൾ എന്നിവ ചർച്ച ചെയ്യാൻ കേന്ദ്ര സർക്കാർ അടിയന്തര സർവകക്ഷി യോഗം വിളിക്കണമെന്ന് ആവശ്യപ്പെടും.
- മുന്നണിയുടെ പ്രവർത്തനം ശക്തിപ്പെടുത്തുന്നതിനായി രണ്ടുമാസത്തിലൊരിക്കൽ യോഗം ചേരാൻ തീരുമാനിച്ചു. അടുത്ത യോഗം ഓഗസ്റ്റിൽ ഹൈദരാബാദിൽ നടക്കും.
- പാർലമെന്റിന്റെ വർഷകാല സമ്മേളനത്തിൽ ഏകോപിത പ്രതിപക്ഷ നിലപാട് ഉറപ്പാക്കാൻ എല്ലാ ദിവസവും രാവിലെ പ്രതിപക്ഷ നേതാവ് മല്ലികാർജുൻ ഖാർഗെയുടെ ഓഫീസിൽ ഏകോപന യോഗം ചേരും.
Leave a Reply