മുംബൈ: ടെക്നോ മ്യൂസിക് കൺസേർട്ടിനിടെ കുഴഞ്ഞുവീണ നിയമ വിദ്യാർഥി മരിച്ചു. ശനിയാഴ്ച രാത്രി വർളിയിലെ എൻ.എസ്.സി.ഐ ഡോമിൽ നടന്ന പരിപാടിക്കിടെയാണ് 28 വയസ്സുകാരനായ വൃഷഭ് ഗാംഗുർഡെയ്ക്ക് ദേഹാസ്വാസ്ഥ്യം അനുഭവപ്പെട്ടത്. ഉടൻ തന്നെ ബ്രീച്ച് കാൻഡി ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അതേ പരിപാടിക്കിടെ അസ്വസ്ഥത അനുഭവപ്പെട്ട 31 വയസ്സുകാരിയായ മറ്റൊരു യുവതിയെ ജസ്ലോക് ആശുപത്രിയിൽ പ്രവേശിപ്പിച്ചിരിക്കുകയാണ്. ഇവരുടെ ആരോഗ്യനില തൃപ്തികരമാണെന്ന് ആശുപത്രി വൃത്തങ്ങൾ അറിയിച്ചു.
അമിതമായ മദ്യപാനമാകാം മരണത്തിന് കാരണമെന്നാണ് പൊലീസിന്റെ പ്രാഥമിക വിലയിരുത്തൽ. അതേസമയം, പരിപാടിക്കിടെ ലഹരിമരുന്ന് ഉപയോഗം ഉണ്ടായിട്ടുണ്ടോയെന്ന കാര്യവും അന്വേഷണ പരിധിയിലുണ്ട്. പോസ്റ്റ്മോർട്ടം റിപ്പോർട്ട് ലഭിച്ചതിന് ശേഷമേ മരണകാരണം സംബന്ധിച്ച് വ്യക്തമായ നിഗമനത്തിലെത്താനാകൂവെന്ന് ഉദ്യോഗസ്ഥർ അറിയിച്ചു.
സംഭവത്തിൽ താർദേവ് പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. മുംബൈ ക്രൈംബ്രാഞ്ചും സമാന്തരമായി അന്വേഷണം നടത്തുന്നുണ്ട്. ഓഡിറ്റോറിയത്തിലെ സി.സി.ടി.വി ദൃശ്യങ്ങളും മറ്റ് ഡിജിറ്റൽ തെളിവുകളും പരിശോധിച്ചുവരികയാണ്. ചികിത്സയിൽ കഴിയുന്ന യുവതി താൻ മദ്യവും എനർജി ഡ്രിങ്കും മാത്രമാണ് ഉപയോഗിച്ചതെന്നും ലഹരിമരുന്ന് ഉപയോഗിച്ചിട്ടില്ലെന്നും പൊലീസിന് മൊഴി നൽകിയതായി അധികൃതർ അറിയിച്ചു.
രണ്ട് മാസം മുമ്പ് ഗോരേഗാവിൽ നടന്ന മറ്റൊരു മ്യൂസിക് കൺസേർട്ടിനിടെയും ലഹരിമരുന്ന് അമിതമായി ഉപയോഗിച്ചതിനെ തുടർന്ന് രണ്ട് വിദ്യാർഥികൾ മരിച്ചിരുന്നു. ആ കേസിൽ വിദ്യാർഥികളെയും ലഹരിമരുന്ന് വിതരണക്കാരെയും ഉൾപ്പെടെ പത്തുപേരെ പൊലീസ് അറസ്റ്റ് ചെയ്തിരുന്നു. അതിന് പിന്നാലെ വീണ്ടും സമാന സംഭവം റിപ്പോർട്ട് ചെയ്യപ്പെട്ടത് വലിയ ആശങ്കയ്ക്ക് ഇടയാക്കിയിട്ടുണ്ട്. വൻ ജനപങ്കാളിത്തമുള്ള പരിപാടികളിലെ സുരക്ഷാ സംവിധാനങ്ങളും ലഹരിമരുന്ന് നിയന്ത്രണ നടപടികളും സംബന്ധിച്ച് ചോദ്യങ്ങൾ ഉയരുന്ന സാഹചര്യമാണ് നിലവിലുള്ളത്.
Leave a Reply