കാലിഫോർണിയ: ലോകകപ്പ് ഗ്രൂപ്പ് ജിയിലെ ആവേശകരമായ പോരാട്ടത്തിൽ ഇറാനും ന്യൂസിലൻഡും രണ്ട് ഗോൾ വീതം നേടി സമനിലയിൽ പിരിഞ്ഞു. രണ്ടുതവണ പിന്നിലായിട്ടും തിരിച്ചടിച്ചിറങ്ങിയ ഇറാൻ തോൽവി വഴങ്ങാതെ ഒരു പോയിന്റ് സ്വന്തമാക്കി.
മത്സരത്തിന്റെ ആറാം മിനിറ്റിൽ ക്രിസ് വുഡിന്റെ പാസിൽ നിന്ന് എലിജ ജസ്റ്റ് ലക്ഷ്യം കണ്ടതോടെ ന്യൂസിലൻഡ് ആദ്യം മുന്നിലെത്തി. എന്നാൽ 31-ാം മിനിറ്റിൽ റാമിൻ റെസായന്റെ ഗോളിലൂടെ ഇറാൻ സമനില പിടിച്ചു. ആദ്യ പകുതിയുടെ അവസാന നിമിഷങ്ങളിൽ ഇറാൻ വീണ്ടും വലകുലുക്കിയെങ്കിലും ഓഫ്സൈഡ് വിധിച്ചതോടെ ലീഡ് നേടാനായില്ല.
രണ്ടാം പകുതിയുടെ 54-ാം മിനിറ്റിൽ ക്രിസ് വുഡ്–എലിജ ജസ്റ്റ് കൂട്ടുകെട്ട് വീണ്ടും ന്യൂസിലൻഡിന് ലീഡ് സമ്മാനിച്ചു. ജസ്റ്റ് മത്സരത്തിലെ തന്റെ രണ്ടാം ഗോൾ നേടി കിവീസിനെ 2-1ന് മുന്നിലെത്തിച്ചു.
എന്നാൽ തിരിച്ചടിക്കാൻ ഇറാൻ അധികം വൈകിയില്ല. 63-ാം മിനിറ്റിൽ റാമിൻ റെസായന്റെ ക്രോസിൽ നിന്ന് മൊഹമ്മദ് മൊഹെബി നേടിയ ഹെഡ്ഡർ ഗോൾ മത്സരത്തെ വീണ്ടും സമനിലയിലാക്കി.
അവസാന മിനിറ്റുകളിൽ ഇരു ടീമുകളും വിജയഗോളിനായി ശക്തമായി ആക്രമിച്ചെങ്കിലും പ്രതിരോധ നിരകൾ ഉറച്ചുനിന്നു. ഇതോടെ ലോകകപ്പിലെ ഏറ്റവും ആവേശകരമായ മത്സരങ്ങളിലൊന്നായി മാറിയ പോരാട്ടം 2-2 സമനിലയിൽ അവസാനിച്ചു.
ഫിഫ റാങ്കിംഗിൽ 20-ാം സ്ഥാനത്തുള്ള ഇറാനെ 85-ാം സ്ഥാനത്തുള്ള ന്യൂസിലൻഡ് സമനിലയിൽ തളച്ചത് ടൂർണമെന്റിലെ ശ്രദ്ധേയ ഫലങ്ങളിലൊന്നായാണ് വിലയിരുത്തപ്പെടുന്നത്.
Leave a Reply