പത്തനാപുരം: കെ.എസ്.ആർ.ടി.സി ബസുകളിൽ സ്ത്രീകൾക്ക് സൗജന്യ യാത്ര അനുവദിച്ച തീരുമാനം സ്വാഗതാർഹമാണെന്ന് മുൻ ഗതാഗതമന്ത്രി കെ.ബി. ഗണേഷ് കുമാർ പറഞ്ഞു. യു.ഡി.എഫ് തെരഞ്ഞെടുപ്പ് വാഗ്ദാനമായിരുന്ന പദ്ധതി നടപ്പാക്കുന്നത് അവരുടെ ബാധ്യതയാണെന്നും അദ്ദേഹം വ്യക്തമാക്കി.
വിദ്യാർഥികളുടെ കാര്യത്തിൽ ആൺ-പെൺ വ്യത്യാസമില്ലാതെ സൗജന്യ യാത്രാ സൗകര്യം നൽകണമെന്നും ഗണേഷ് കുമാർ ആവശ്യപ്പെട്ടു. അതേസമയം, ഓർഡിനറി ബസുകളെ സിറ്റി ഫാസ്റ്റ് ബസുകളാക്കി മാറ്റിയെന്ന പരാതികൾ പരിശോധിക്കണമെന്നും അദ്ദേഹം പറഞ്ഞു.
കെ.എസ്.ആർ.ടി.സിക്കായി ബസുകൾ വാങ്ങിയതിൽ അഴിമതി നടന്നെന്ന ആരോപണങ്ങളും അദ്ദേഹം നിഷേധിച്ചു. എയർ സസ്പെൻഷൻ ബസും സ്പ്രിങ് സസ്പെൻഷൻ ബസും തമ്മിലുള്ള വിലവ്യത്യാസം വളരെ കുറവാണെന്നും, മാധ്യമങ്ങളിൽ പ്രചരിക്കുന്ന കണക്കുകൾ തെറ്റാണെന്നും അദ്ദേഹം പറഞ്ഞു.
രണ്ട് ഘട്ടങ്ങളിലായി നടത്തിയ ബസ് വാങ്ങലിലൂടെ കെ.എസ്.ആർ.ടി.സിക്ക് ലാഭമാണ് ഉണ്ടായതെന്നും, പ്രചരിക്കുന്ന രേഖകളുടെ ഉറവിടം അന്വേഷിക്കണമെന്നും അദ്ദേഹം ആവശ്യപ്പെട്ടു. ഇക്കാര്യത്തിൽ സർക്കാർ അന്വേഷണം നടത്തണമെന്നും ബന്ധപ്പെട്ട ഉദ്യോഗസ്ഥരെ കണ്ടെത്തണമെന്നും അദ്ദേഹം കൂട്ടിച്ചേർത്തു.
ബസ് വാങ്ങലുമായി ബന്ധപ്പെട്ട് തനിക്കെതിരെ ഉയരുന്ന ആരോപണങ്ങൾ അടിസ്ഥാനരഹിതമാണെന്നും, ഏത് അന്വേഷണവും നേരിടാൻ തയ്യാറാണെന്നും ഗണേഷ് കുമാർ പറഞ്ഞു. ആവശ്യമെങ്കിൽ സി.ബി.ഐ അന്വേഷണം പോലും നടത്താമെന്നും അദ്ദേഹം വ്യക്തമാക്കി.
ബസ് വാങ്ങലിന് പ്രതിഫലമായി വാഹനം ലഭിച്ചെന്ന പ്രചാരണവും അദ്ദേഹം തള്ളി. ഫെഡറൽ ബാങ്കിൽ നിന്ന് വായ്പ എടുത്താണ് വാഹനം വാങ്ങിയതെന്നും അതിന്റെ രേഖകൾ പരിശോധിക്കാമെന്നും അദ്ദേഹം പറഞ്ഞു.
പത്തനാപുരത്തെ തിരഞ്ഞെടുപ്പ് ഫലത്തെക്കുറിച്ചും ഗണേഷ് കുമാർ പ്രതികരിച്ചു. മതേതര നിലപാട് സ്വീകരിച്ചതിന്റെ പേരിലാണ് താൻ പരാജയപ്പെട്ടതെന്നും, അതിനെ ധാർമിക വിജയമായാണ് കാണുന്നതെന്നും അദ്ദേഹം പറഞ്ഞു. മണ്ഡലത്തിൽ കോൺഗ്രസും ബി.ജെ.പിയും തമ്മിൽ ധാരണയുണ്ടായിരുന്നുവെന്നും അദ്ദേഹം ആരോപിച്ചു.
Leave a Reply