മുള്ളൻപൂര്: അഫ്ഗാനിസ്ഥാനെതിരായ ടെസ്റ്റ് മത്സരത്തിൽ ഇന്ത്യ ശക്തമായ നിലയിൽ. രണ്ടാം ദിനം കളി പുരോഗമിക്കുമ്പോൾ ആദ്യ ഇന്നിംഗ്സിൽ ആറ് വിക്കറ്റ് നഷ്ടത്തിൽ 503 റൺസാണ് ഇന്ത്യ നേടിയത്. 26 റൺസുമായി വാഷിംഗ്ടൺ സുന്ദറും 25 റൺസോടെ മാനവ് സുതാറും ക്രീസിലുണ്ട്. രണ്ടാം ദിനത്തിലെ ആദ്യ സെഷനിൽ ക്യാപ്റ്റൻ ശുഭ്മാൻ ഗിൽ, റിഷഭ് പന്ത്, ധ്രുവ് ജുറെൽ എന്നിവരുടെ വിക്കറ്റുകളാണ് ഇന്ത്യയ്ക്ക് നഷ്ടമായത്. ഗിൽ 126 റൺസും പന്ത് 81 റൺസും നേടിയപ്പോൾ ജുറെൽ 19 റൺസെടുത്ത് പുറത്തായി. അഫ്ഗാനിസ്ഥാനായി മുഹമ്മദ് സലീം സഫി നാല് വിക്കറ്റുകൾ വീഴ്ത്തി.
മൂന്ന് വിക്കറ്റ് നഷ്ടത്തിൽ 368 റൺസെന്ന നിലയിൽ രണ്ടാം ദിനം ആരംഭിച്ച ഇന്ത്യയെ ഗില്ലും പന്തും ചേർന്ന് 400 റൺസ് കടത്തുകയായിരുന്നു. 416 റൺസിൽ നിൽക്കെയാണ് സലീം സഫി ഗില്ലിനെ പുറത്താക്കി അഫ്ഗാനിസ്ഥാനെ മത്സരത്തിലേക്ക് തിരിച്ചുകൊണ്ടുവന്നത്. 177 പന്തുകൾ നേരിട്ട ഗിൽ 15 ഫോറും ഒരു സിക്സും ഉൾപ്പെടെ 126 റൺസാണ് നേടിയത്. തുടർന്ന് റിഷഭ് പന്തും ധ്രുവ് ജുറെലും ചേർന്ന് ഇന്ത്യയുടെ സ്കോർ 450 കടത്തി. എന്നാൽ 19 റൺസെടുത്ത ജുറെലിനെ സലീം സഫി ബൗൾഡാക്കി മടക്കി.
സെഞ്ചുറിയിലേക്ക് മുന്നേറുകയായിരുന്ന റിഷഭ് പന്തിനെയും അഫ്ഗാൻ ബൗളർമാർ പുറത്താക്കി. ഷാഹിദിയുടെ പന്തിൽ അസ്മതുള്ള ഒമർസായിക്ക് ക്യാച്ച് സമ്മാനിച്ചാണ് താരം മടങ്ങിയത്. 121 പന്തുകളിൽ നിന്ന് ആറ് ഫോറും മൂന്ന് സിക്സും ഉൾപ്പെടെ 81 റൺസാണ് പന്ത് നേടിയത്. തുടർന്ന് വാഷിംഗ്ടൺ സുന്ദറും മാനവ് സുതാറും ചേർന്ന് ഇന്ത്യയുടെ സ്കോർ കൂടുതൽ ഉയർത്തി 500 കടത്തി.
Leave a Reply